NAMMINERSORLUTIK OQARTUSSAT
Kalaallit Nunaanni Namminersorlutik Oqartussat pillugit inatsit naapertorlugu Namminersorlutik Oqartussat tassaapput Inatsisartut inuit qinigaat, aamma Naalakkersuisut pisortat ingerlatsinerannut akisussaasuullutik naalakkersuisuusut.
21. juni 2009 aallarnerfigalugu Namminersornerullutik Oqartussat Namminersorlutik Oqartussanit taarserneqarput.
Inatsisartut
Inuit qinigaat imaluunniit Inatsisartut, 1. maj 1979-mi Namminersornerullutik Oqartussaqalerneratigut pilersinneqarput. Inatsisartut inuit qinigaannik 31-nik ilaasortaqartarput.
Inatsisartut ukiuat aallartittarpoq septemberimi tallimanngornerit pingajuanniit ukiullu tulliuttumi tallimanngornerup taassuma tungaanut sivisussuseqarluni. Inatsisartut ukiuata ingerlanerani Inatsisartut ikinnerpaamik marloriarlutik ileqquussumik katersuuttarput. Immikkut pisut pissutigalugit tamanna pisariaqartinneqaleraangat Inatsisartut aamma immikkut ittumik ataatsimiigiaaqquneqarsinnaapput.
Inatsisartut siulittaasoqarfiat ataatsimiititaliallu
Inatsisartut siulittaasoqarfeqarput Inatsisartunut ilaasortanit sisamanik siulittaasumillu ilaasortaqartumik.
Siulittaasup inatsisartut ataatsimiittarneri isumagisarisarpai, nalinginnaasumik upernaakkut ukiakkullu ingerlanneqartartut. Taamatuttaaq siulittaasup ataatsimiissutaaasa kalaallisut danskisullu saqqummersinneqartarnerat isumagisarisarpaa.
Inatsisartut siulittaasuata Kalaallit Nunat Avannarliit Siunnersuisoqatigiiffianni aammalu danskit folketingiannut attaveqartarneq isumagisarisarpai. Inatsisartut Allattoqarfiata ulluinnarni aqutsineq isumagisarisarpaa.
Inatsisartut inatsisitigut pisussaaffittut ataatsimiititaliat ukua pilersittarpaat: Inatsisartut aningaasaqarnermut ataatsimiititaliaat, Inatsisartut nunatta karsiata naatsorsuutaasa kukkunersiorneqartarnerannut ataatsimiititaliaat aamma Nunanut allanut sillimaniarnermullu ataatsimiititaliaq. Inatsisitigut aalajangigaallutik ataatsimiititaliat pingasuussut saniatigut ullumikkut ataavartumik ataatsimiititaliat 12-it Inatsisartunut toqqaannartumik atasuupput.
Inatsisartut Allattoqarfiat
Inatsisartut Allattoqaarfiat tassaavoq Inatsisartut ataatsimoortumik aqutsisoqarfiat. Aqutsineq inatsisartut siulittaasuata aamma Inatsisartut Siulittaasoqarfianut atavoq.
Inatsisartut Allattoqarfiat Inatsisartut Allattuuneranit pisortaaffigineqarpoq. 1. april 2009 aallarnerfigalugu atuuffiit nutaat pilersinneqarput, Siulittaasoqarfiup Allattoqarfia aamma Tusagassiisarnermut paasissutissiisarnermullu Immikkoortoqarfik. Tamatuma saniatigut allattoqarfik ataatsimiititalianut allatseqarfimmik immikkoortoqarpoq, nutserisoqarfeqarluni, sullissiveqarluni aningaasaqarnermullu immikkoortortaqarluni.
Inatsisiliortarneq
Inatsisit allannguutissaannut, inatsisinut nutaanut peqqussutissanullu siunnersuutit nalinginnaasumik naalakkersuisunit saqqummiunneqartarput, aammali inatsisartunut ilaasortanit ataasiakkaanit saqqummiunneqarsinnaallutik. Inatsisissanut peqqussutissanullu siunnersuutit tamarmik Inatsisartuni pingasoriarlugit oqaluuserineqartarput.
Qinersinerit
Inatsisartut ukiut sisamakkuutaarlugit qinerneqartarput, qinersinissamulli piffissanngunngikkaluartoq qinersisitsineqarsinnaasarpoq. Kingullermik 2. juni 2009-imi qinersisoqarpoq.
Qinersereernermi Inatsisartut ombudsmandimik toqqaasarput, taassumalu ilaatigut isumagisassaraa, immikkoortup tullia naapertorlugu ilaatigut Naalakkersuisut kommunillu ingerlatsinerat inatsiseqartitsinermut ingerlatsinermilu ileqqorissaarnissamut naapertuuttuunersut nakkutigissallugit ilaatigut suliassaqartitaasoq.
Inatsisartut Ombudsmandiat
Ombudsmandi Inatsisartunit toqqarneqartarpoq Inatsisartullu sinnerlugit Namminersorlutik Oqartussat kommunillu ingerlatsinerat nakkutigisassaralugit.
Ombudsmandip atuuffimminik isumaginninnermini Inatsisartunit naalakkersuinermullu tunngasuniit akuliuffigineqarneq ajorpoq. Ombudsmandi suliani pillugit Inatsisartunut ukiumoortumik nalunaarusiortarpoq. Nalunaarusiaq naqiterneqartarpoq tamanullu saqqummiunneqartarluni.
Takussutissiaq 1
Suliassat Inatsisartut Ombudsmandianit suliarineqarsimasut
|
1999 |
2000 |
2001 |
2002 |
2003 |
2004 |
2005 |
2006 |
2007 |
2008 |
2009 |
Suliassat aallartitat |
110 |
82 |
93 |
95 |
148 |
107 |
108 |
92 |
117 |
86 |
86 |
Suliassat, nammineq aallartitat |
23 |
30 |
11 |
14 |
39 |
10 |
24 |
5 |
21 |
21 |
8 |
Siunnersuinerit |
139 |
80 |
53 |
76 |
135 |
51 |
138 |
108 |
143 |
111 |
91 |
Naammagittaalliutit suliariumanngisat 1) |
71 |
62 |
53 |
53 |
93 |
92 |
99 |
63 |
69 |
48 |
61 |
Suliassat naammassisat |
49 |
52 |
21 |
39 |
39 |
35 |
16 |
35 |
26 |
19 |
22 |
Suliat naammassineqanngitsut 2) |
130 |
84 |
82 |
41 |
43 |
41 |
41 |
27 |
88 |
145 |
151 |
Nassuiaat: 1) Suliat
itigartinneqartut Tabel 1 takuneqarsinnaavoq. 2) Suliat naammassineqanngitsut
ombudsmandip nammineq ingerlassimasai ilanngullugit.
Najoqqutaq: Inatsisartut Ombudsmandiat
Suliassat pisortaqarfinni suliarineqartarnerat
Sulianik suliarinnittarneq tamanut saqqumisumik pissuseqarnissaq pillugu inatsit naapertorlugit tunngaviutinneqartarput.
Suliassat suliarineqartarnerat pillugu inatsisip ilaatigut ingerlatsineq pillugu inatsiseqartitsinermi isummat tunngaviusut, qangali ingerlatsinermi atuutereersut, inatsisitigut aalajangertarpai. Inatsit pisortat ingerlatsineranni suliassat suliarineqartarnerinik pitsaanerulersitseqataassaaq ingerlatsinerullu aalajangiinerisa inatsisinut naapertuuttuunissaasa eqqortuunissaasalu qularnaarneqartarnerat annertusaavigalugu.
Tamanut saqqumisumik pissuseqarnissaq pillugu inatsit pisortani suliat suliarineqartut pappiarartaasa takuneqarsinnaatitaanerannut innuttaasut pisussaaffeqarnerat pillugu aalajangersakkanik imaqartinneqarpoq.
Naalakkersuisut
Naalakkersuisut naalakkersuisuupput Naalakkersuisut siulittaasuannit toqqagaasut. Naalakkersuisut siulittaasuat inatsisartunit toqqarneqartarpoq. Naalakkersuisut Namminersorutik Oqartussat ulluinnarni ingerlatsinerannut politikkikkut akisussaasuupput. Naalakkersuisut maannakkut naalakkersuisoqarfinnut arlalinnut immikkoortitigaapput.
Naalakkersuisoqarfinni ataasiakkaani naalakkersuisoqarfeqarpoq inatsisiliornermik sulianillu nalinginnaasunik, ineriartortitsinermik pilersaarusiornermillu sulianik il.il. isumagisaqartunik. Naalakkersuisoqarfiit ataanniipput aqutsisoqarfiit arlallit suliaqarfinni aalajangersimasunik arlalinnik ingerlatsiffiusut. Naalakkersuisut ingerlatsinerat inatsisinik aningaasaliissutinillu, Inatsisartunit akuersissutigineqarsimasunik, tunngaveqarluni ingerlanneqartarpoq.
Naalakkersuisut ingerlatsinerat Inatsisartunit nakkutigineqartarpoq, ilaatigut Nunatta karsiata naatsorsuutaanik kukkunersiuinikkut. Aammattaaq Naalakkersuisut allaffissornikkut ingerlatsinerat inatsisit aammalu ingerlatsinermi ileqqorissaarnissaq naapertorlugu ingerlatsinissaat.
Takussutissiaq 2
Naalakkersuisooqatigiit
Naalakkersuisut siulittaasuat |
||
Siumut: 5 |
Jonathan Motzfeldt |
1979 |
Siumut: 6 |
Jonathan Motzfeldt |
1983 |
Siumut: 5, Inuit ataqatigiit: 2 |
Jonathan Motzfeldt |
1984 |
Siumut: 5, Inuit Ataqatigiit: 2 |
Jonathan Motzfeldt |
1987 |
Siumut: 5 |
Jonathan Motzfeldt |
1988 |
Siumut: 5, Inuit Ataqatigiit: 2 |
Lars Emil Johansen |
1991 |
Siumut: 5, Atassut: 2 |
Lars Emil Johansen |
1995 |
Siumut: 5, Inuit Ataqatigiit: 2 |
Jonathan Motzfeldt |
1999 |
Siumut: 5, Atassut: 2 |
Jonathan Motzfeldt |
2001 |
Siumut: 4, Inuit Ataqatigiit: 3 |
Hans Enoksen |
Dec 2002 |
Siumut: 4, Atassut: 3 |
Hans Enoksen |
Jan 2003 |
Siumut: 4, Inuit Ataqatigiit: 4 |
Hans Enoksen |
Sep 2003 |
Siumut: 4, Inuit Ataqatigiit: 2, Atassut 2 |
Hans Enoksen |
Dec 2005 |
Siumut: 4, Atassut: 3 |
Hans Enoksen |
Maj 2007 |
Inuit Ataqatigiit: 6, Demokraatit: 2, Kattusseqatigiit Partiiat: 1 |
Kuupik Kleist |
Juni 2009 |
Najoqqutaq: Naatsorsueqqissaartarfik
Nunani allani sinniisuutitaqarneq
Kalaallit Nunaata Københavnimi sinniisoqarfia
Kalaallit Nunaata Københavnimi sinniisuutitaqarfia Naalakkersuisut siulittaasuata naalakkersuisoqarfiata ataani immikkoortuuvoq. Sinniisoqarfik Savalimmiut sinniisoqarfiat Islandillu sinniisoqarfia ineqatigalugit siornatigut KGH-p quersuani Nordatlantens Bryggemi Strandstrædemiippoq.
Sinniisoqarfiup suliassaraa Naalakkersuisut, Inatsisartut, Nuummi qitiusumik aqutsisoqarfik, Namminersorlutik Oqartussat suliffeqarfiutaat aamma kommunit sullisisallugit kiisalu Danmarkimi
Kalaallit Nunaata Bruxellesimi sinniisuutitaqarfia
Kalaallit Nunaata Bruxellesimi sinniisuutitaqarfia danskit Belgiami aallartitaqarfiannut atavoq. Sinniisoqarfiup suliarisartagai ilaatigut ukuupput: EU-mik isumaqatigiinniarnerit ataqatigiissaarneqarneranniit, ilaatigut aalisarneq pillugu isumaqatigiissummut atatillugu, Kalaallit Nunaata EU-llu akornanni attaveqaqatigiinnissamut isumaqatigiissutinut aamma OLT-mi suleqatigiinnermut aammalu ataatsimiititaliaagallartut arlallit suliarisartagaannut tunngasut. Peqatigitillugu sinniisoqarfiup EU-kommissionimik, Ministerrådimik Europa-parlamentimillu sinniisuutitallu aallartitaannik oqaloqatiginnittarnernut Bruxellesimilu sinniisoqarfinnut oqaloqatiginnittarnerit isumagisarisarpai.
Nittartakkat takuneqarsinnaasut
Kalaallit Nunaanni Namminersorlutik Oqartussat, Naalakkersuisut aamma Kalaallit Nunaata nunani allani sinniisuutitaqarfii pillugit paasisaqarnerorusukkuit nittartagaq una takuuk: www.nanoq.gl
Inatsisartut pillugit paasisaqarnerorusukkuit nittartagaq una takuuk: www.inatsisartut.gl
Qinersinerit pillugit nittartagaq una takuuk: www.qinersineq.gl.
Inatsisartut Ombudsmandiat pillugu paasiaqarnerorusukkuit nittartagaq una takuuk: www.ombudsmand.gl
1979-mi Namminersornerullutik Oqartussaalernerup kingorna inatsisit, nalunaarutit peqqussutillu tamarmiusut nittartakkami uani takuneqarsinnaapput: www.inatsisit.gl